Технологийн салбарын компаниуд дельта вирусийн улмаас оффисоор ажиллах товоо хойшлуулсаар байгаа билээ. Тэгвэл оффис цуглах товоо хойшлуулсан компаниудын жагсаалтад Фэйсбүүк нэмэгджээ.
Фэйсбүүкийн хэвлэлийн төлөөлөгч Клои Майер “Оффис цуглах товыг бид он сар, цаг хугацаанд бус баримт мэдээлэлд тулгуурлан тогтдог. Коронавирусийн дельта хувилбарын тохиолдол ихсэж байгаа үзүүлэлт, мэдээлэлд үндэслэж, бид АНУ-д ажилладаг ажилчдаа 2022 оны нэгдүгээр сар хүртэл оффист цуглахыг шаардахгүй. Мөн АНУ-аас гадна зарим орнуудад ч оффис цуглах товыг 2022 оны нэг сар хүртэл хойшлуулна” хэмээн мэдэгдэл хийсэн байна.
Технологийн салбарын томоохон компаниуд угтаа энэ оны есдүгээр сард оффис цуглахаар тов тогтсон байсан ч дельта вирусийн улмаас ихэнх нь хойшлуулах арга хэмжээ авч байгаа бол зарим нь вакцины гэрчилгээ шаардаж байгаа юм.
Эх сурвалж: CNN