Афганистан улсын ерөнхийлөгч асан Ашраф Гани засаглалыг нь нураасан Талибан цэргүүдэд ерөнхийлөгчийн ордноо орхисны дараа өөрийн Фэйсбүүк хуудаснаа “Цус урсгахаас зайлсхийхдээ би тус улсыг орхисон нь дээр гэж үзлээ” хэмээн нийтэлжээ.
Тэрээр өөрийн хаашаа дүрвэж байгааг хэлээгүй ч Ал Жазеерагийн мэдээлж байгаагаар ерөнхийлөгч асан Ашраф Гани Узбекистан улс руу дүрвэсэн гэнэ.
Харин Даваа гарагт Кабул дахь ОХУ-ын элчин сайдын яамны хэвлэлийн төлөөлөгч Никита Ищенкогийн хэлснээр Афганистаны ерөнхийлөгч асан Ашраф Гани 4 машин, 1 нисдэг тэрэг дүүрэн мөнгөтэй зугтсан аж.
Түүний “Дөрвөн машин нь дүүрэн мөнгөтэй байсан ч тэд илүү гарсан мөнгийг нисдэг тэргэнд багтаах гэж оролдож, багтаагүй үлдсэн мөнгийг зам дээр орхиод явсан” гэж хэлсэн нь ОХУ-ын хэвлэлд нийтлэгджээ.
Associated Press агентлаг түүнээс хэрхэн болсон явдлын тухайд тийм дэлгэрэнгүй мэдэж байгаагаа асуухад Никита Ищенко, "Бид энд ажиллаж байгаа шүү дээ” гэж хэлээд өөр нэмэлт тайлбар өгөөгүй байна. Харамсалтай нь Reuters агентлаг ч түүний хэлсэн үг хэр үнэний ортой болохыг баталж чадаагүй байгаа юм.
Эх сурвалж: NY Post