Даваа гарагт ХБНГУ-ын Сангийн агентлаг Луфтханса авиа компанийн 5 хувь хүртэлх хувьцааг зарахаа мэдэгджээ. Тус мэдэгдлийн дараагаар Луфтханса компанийн хувьцааны үнэлгээ 4.9 хувиар унасан байна.

Коронавирусийн цар тахлын хүнд үед дэлхий дахинаа агаарын тээврийн салбар уналтад орж байх үеэр Луфтханса авиа компани Германы Эдийн засгийн тогтвортой байдлын сангаас 7 тэрбум долларын тусламж авч байжээ.

Тусламжийн хариуд Луфтханса компанийн хувиас 350 сая ам.долларын үнэлгээ бүхий 20 хувийг тус санд шилжүүлж өгсөн юм.

Тийнхүү өдгөө тус агаарын тээврийн компани сэргэж, сангийн эзэмшлийн 20 хувийн хувьцаа 1.18 тэрбум долларт хүрснээр тодорхой хувиа зарах шийд гаргажээ.

Мөн тэдний хэлж байгаагаар 2023 он гэхэд бүх хувиа зарах гэнэ.

Одоогийн байдлаар Луфтханса авиа компанийн ХБНГУ-ын сонгууль болохоос өмнө зах зээлд шинэ хувьцаа нийлүүлэхээр төлөвлөж байгаа ажээ.

Эх сурвалж: Reuters