Афганистан, Кабул – Лхагва гарагт Талибаны цэргүүд өөрсдийнх нь тугийг буулгаж, Афганистаны төрийн далбаагаар солих гэсэн эсэргүүцэгчдийг хүч хэрэглэн тараажээ. Эсэргүүцлийн улмаас нэг хүн амиа алдаж, Афганичуудыг улам л айдаст автуулаад авчээ.

Хэдийгээр Талибанчууд өмнөх шигээ хэрцгий аргаар тус улсыг удирдахгүй, хүний эрхийг хүндэтгэнэ хэмээн хэлж байсан ч Жалалабад хотод болсон албадлага өөрөөр өгүүлж байгаа юм.

Эсэргүүцэгчид Афганистаны зүүн өмнөдөд байрлалтай Жалалабад хотод цугларч, Тусгаар тогтнолын өдрийнхөө өмнөх өдөр өөрийн улсын тугийг мандуулж, Талибаны тугийг буулгахыг оролдож байжээ.

Дүрс бичлэгт бууснаар Талибанчууд агаарт хий буудаж, эсэргүүцэгчдийг бороохойгоор цохин тараасан байна.

Эсэргүүцлийн үр дүнд нэг хүн амиа алдаж, зургаан хүн шархадсан гэнэ.

Афганистаны тусгаар тогтнолын өдөр өнөөдөр буюу наймдугаар сарын 19-ний өдөр тохиож байгаа ч өдгөө Талибанчуудад эзлэгдээд байгаа юм. Эл өдрийг анх 1919 онд Афганистан улс Их Британийн засаглалаас гарсныг тохиолдуулан тэмдэглэж иржээ.

Эх сурвалж: StarTribune