Токио 2020 - Арванзургаа дахь зуны Паралимпын наадам эхлэхэд 5 хоног үлдээд байгаа юм. Гэвч Паралимп эхлээ ч үгүй байхад Паралимпын хотхонд коронавирусийн тохиолдол бүртгэгджээ.
Паралимпыг зохион байгуулагчдын зүгээс мэдэгдсэнээр коронавирус илэрсэн хүн тэмцээнд оролцох тамирчин эсхүл Япон улсын оршин суугч ч биш гэнэ.
Паралимптай холбоотой нийт 70 гаруй коронавирусийн халдвар илрээд байсан ч тамирчид, дасгалжуулагч нарын байрлах хотхонд коронавирусийн халдвар огт бүртгэгдээгүй байсан юм.
Энэ удаагийн Паралимпын наадамд ойролцоогоор 4400 тамирчин өрсөлдөхөөр бүртгүүлээд байгаа аж.
Харин коронавирусийн халдвар хамгааллын дэглэмийн хувьд Олимпын наадам хэрхэн зохион байгуулагдсантай адилаар оролцогчид өдөр бүр шинжилгээ өгөх бөгөөд хотхон дотор амны хаалт зүүж, хүн хоорондын зай барих юм.
Токио хот одоогоор дөрөвдүгээр түвшний онц байдал зарласан байгаа ба Паралимпыг ямар ч үзэгчгүйгээр зохион байгуулахаар болжээ.
Эх сурвалж: BBC