Олон улсын цөмийн энергийн агентлаг болон Японы засгийн газрын хамтарсан баг Фукушима Дайчи цөмийн цахилгаан станцын бохирдсон усанд аюулгүй байдлын үнэлгээг ирэх сараас эхлэн газар дээр нь очин хийхээр болжээ.
Японы Эдийн засаг, худалдаа, аж үйлдвэрийн сайд Казияма Австрийн Вена дахь ОУЦЭА-ийн төв байранд зочлохдоо Ерөнхий нарийн бичгийн дарга Гроситой уулзаж Фукушима атомын станцын бохирдсон усанд аюулгүй байдлын үнэлгээ хамтран хийх талаар хэлэлцэж тохиролцсон ажээ.
Үүнтэй холбогдуулан ОУЦЭА-ийн албаны хүмүүс, шинжээчид ирэх сараас эхлэн Токио болон Фүкүшимад очиж нарийвчилсан төлөвлөгөө гарган ажиллахаар болсон аж.
Эдийн засаг, худалдаа, аж үйлдвэрийн сайд Казияма уулзалтын дараа сэтгүүлчдэд уг үйл ажиллагааны талаар хэлэхдээ үнэн зөв, ил тод байдлыг нэмэгдүүлэхийн тулд бид ОУЦЭА-тай хамтран ажиллахаар шийдвэрлэсэн хэмээжээ.
Өнгөрөгч 4-р сард Япон улс Фукушимагийн цахилгаан станцын талбайн агуулах танканд хадгалагдаж буй усыг хоёр удаа цэвэршүүлсний дараа далайд асгахаа мэдэгдэж байсан билээ.
Гэсэн хэдий ч Өмнөд Солонгос, Хятад зэрэг хөрш зэргэлдээ орнууд одоогоор ямар ч технологийн тусламжтайгаар цэвэрлэх боломжгүй тритий гэх өндөр идэвхит цацрагт бодисоор бохирлогдсон усыг далайд асгахыг эрс эсэргүүцсээр байгаа юм.
Үүний зэрэгцээ Өмнөд Солонгосын талаас цацраг идэвхт бодисоор хордсон усны талаарх хоёр талын зөвлөлийг байгуулах санал дэвшүүлсэн хэдий ч Японы засгийн газар зүгээс энэ талаар ямар нэгэн байр сууриа илэрхийлэхгүй байсаар байгаа юм.
Эх сурвалж: YTN News