Энэтхэгийн орон нутгийн NDTV-ийн 20-ны өдөр мэдээлснээр, Афганистаны нийслэл Кабул хотод амьдардаг 49 настай хамгаалагч Валли Салик 16-ны өдөр байшингийнхаа тагтан дээрээс хоёр цогцос олжээ.
Тэрээр дугуй хагарах шиг чимээ сонсоод очиход хоёр цогцос унасан байсан ба эхнэр нь хараад ухаан алдсан тухай ярьжээ.
Тухайн өдөр зурагт үзсэн хөршүүд нь шарил АНУ-ын тээврийн онгоцноос унасан байж магадгүй гэж хэлжээ.
Тэдний төрсний гэрчилгээг шалган эмч мэргэжилтэй Сапиула Хотак, Фида Мохаммед нар болохыг тогтоожээ. Тэд хоёул 20 орчим насны хүмүүс байжээ.
Өнгөрөгч 16-ны өдөр Талибанчууд Афганистаныг хяналтандаа авах үйл ажиллагаа ид эрчимжиж байх үед нийслэл Кабулаас зугтахаар энгийн номхон иргэд Америкийн тээврийн онгоцны дугуйнаас зүүгдэж байгаад унаж буй дүр зураг хэвлэл мэдээллийн хэрэгслээр цацагдсан билээ.
Ройтерс агентлагийн 19-ний өдөр (орон нутгийн цагаар) мэдээлснээр Афганистаны хөлбөмбөгийн шигшээ багийн тоглогч Заки Анвари мөн өдөр Кабулын нисэх онгоцны буудлаас хөөрсөн АНУ-ын тээврийн онгоцноос унаж нас барсан тухай орон нутгийн хэвлэлд дурдсан байна.
Эх сурвалж: KBS