Вьетнамын хамгийн том хот болох Хо Ши Минд шинэ коронавирусын халдвар маш хурдацтай тархаж буйн улмаас тус хотод цэргийн хүч дайчлан хатуу хөл хорио тогтоохоор шийдвэрлэжээ.
Орон нутгийн хэвлэл мэдээллийн хэрэгсэл болох VN Express Хо Ши Мин хот 23-ны өдрөөс эхлэн хатуу хөл хорио тогтоох шийдвэр гаргасныг мэдээлжээ.
Зайлшгүй тохиолдолд гадагшаа гарах зөвшөөрөл олгох болон хоол хүнс, хэрэгцээт зүйлсийн хуваарилалтын талаархи тодорхой удирдамжийг эцэслэн гаргасны дараа зарлана гэж мэдэгджээ.
Хөл хорионы үеэр Вьетнамын засгийн газар цэргийн хүчээ дайчилж, хоол хүнс тараах, хорио цээрийн зааварчилгаа өгөхөөр төлөвлөж байгаа бол олон нийтийн аюулгүй байдлын албаныхан дэг журам сахиулж, орон гэргүй хүмүүс, эмзэг бүлэгт хоол хүнс тараахаар төлөвлөж байна.
Хо Ши Мин хотын захиргаанаас өдөр тутмын хэрэгцээт зүйл болон эм худалдаж авахаас бусад тохиолдолд, мөн шөнийн цагаар гадагш гарахыг ирэх сарын 15 хүртэл хориглож байгааг мэдэгдлээ.
Ханой хотын захиргаа ч одоогийн мөрдөж байгаа хатуу хөл хориог ирэх сарын 6 хүртэл сунгахаар шийджээ.
Өчигдөр Вьетнамд Ковид-19 өвчний 10,650 шинэ тохиолдол бүртгэгдсэн бөгөөд хоёр дахь өдрөө дараалан 10,000-с дээш тохиолдол бүртгэгдээд байгаа юм.
Вьетнамд өнгөрсөн 4-р сарын 27-нд эхэлсэн цар тахлын дөрөв дэх давалгааны улмаас өнөөдрийг хүртэл батлагдсан тохиолдол 309,210 болоод байгаа юм.
Эх сурвалж: KBS