Нохойн асрамжийн газрыг хариуцан ажилладаг ажилчдын дунд коронавирусийн халдвар тархахаас сэргийлэн Австралийн Нью Соут Уэльс мужийн Боурк Ширийн зөвлөлөөс 15 нохойг устгасанд ихээхэн шүүмжлэл хүлээгээд байгаа юм.
Нью Соут Уэльс мужийн хойд хэсэгт байрлалтай Боурк Ширийн зөвлөлөөс өнгөрөгч ням гарагт 10 гөлөг, 5 нас бие гүйцсэн нохойг буудан хороосон ажээ. Тэдний зүгээс амьтдыг алах нь зөв шийдвэр байсан бөгөөд амьд үлдээсэн тохиолдолд өөр бүсийн хүмүүс тэднийг авах гэж ирэх байсан хэмээжээ.
Зөвлөлийн хэлж байгаагаар тэднийг орогнуулж байсан хорооных нь багтаамж дүүрсэн бөгөөд хоёр нохой нь ихээхэн авиртай байжээ. Мөн нохдод найдвартай эзэн олж өгөх үүрэгтэй ажилладаг хүн нь байгаагүй тул тийм шийдвэр гаргасан гэнэ.
Энэ тухайд Амьтны шударга ёсны намын хууль санаачлагч Эмма Хурст, “Тэр хөөрхийлөлтэй төөрсөн эсхүл хаягдсан амьтад өөрийн гэсэн хайр дүүрэн эзэдтэй болох боломжгүй болсныг бодоход л сэтгэл үнэхээр их өвдөж байна” хэмээжээ.
Тус мужийн хувьд одоогоор хөл хорионд байгаа бөгөөд коронавирусийн тохиолдол нэмэгдэж байгаа үзүүлэлттэй байгаа юм.
Эх сурвалж: USA Today