Оросын сөрөг хүчний удирдагч Алексей Навальный оросын шоронд хоригдохыг хятадын хөдөлмөрийн лагерьтай адилтгажээ.
Тэрээр өнгөрөгч нэгдүгээр сард баривчлагдсанаасаа хойш анх удаа Нью Йорк Таймст яриа өгч, тус ярилцлагадаа тийн адилтгасан байна.
Алексей Навальный хордлогын эсрэг эмчилгээ хийлгэж байхдаа давж заалдах журмыг зөрчсөн гэсэн үндэслэлээр 2 жил хагасын ял эдэлж байгаа юм.
Ярилцлагад тэрээр шоронд орсон эхний долоо хоногт түүний дөрвөн мөч мэдээгүй болж, 24 хоногийн турш өлсгөлөнд нэрвэгдсэн тухайгаа ч дурджээ.
Тэрээр “Та бүхэн магадгүй биеэрээ дүүрэн шивээстэй, шүдээ алт мөнгөөр бүрж, хутга нуусан эрчүүдийг төсөөлж байж болох юм. Гэхдээ тийм биш ээ. Юутай адилтгаж төсөөлөхөө мэдэхгүй байвал хятадын хөдөлмөрийн лагерь шиг гээд бодчих. Хоригдлууд нэг эгнээнд цувж, камерууд хаа сайгүй өлгөөтэй тийм л газар. Тэд үргэлж ажиглаж байдаг” хэмээсэн байна.
Мөн цаашлаад тэрээр шоронд хоригдох нь сэтгэлзүйн хувьд хүчирхийлүүлж байгаатай ижил хэрэг гэдгийг хэлж, өдөрт хэрхэн таван удаа зурагт үзэхээр цугладаг байснаа ч ярьжээ. Түүнчлэн Алексей нэг ч удаа бусад хоригдлуудтай асуудалд ороогүйгээр барахгүй харин ч тэдэнтэй зугаатай байдаг тухайгаа хэлсэн юм.
Энэ сарын эхэнд түүнд дахин нэг хэрэг үүсгэсэн нь цар тахлын үед жагсаал цуглаан зохион байгуулахад хүмүүсийг уриалсан гэж үзэж байгаа ажээ. Хэрэв Алексей тус хэрэгт буруутай болох нь тогтоогдвол 3 хүртэлх жилийн ял нэмүүлэх гэнэ.
Эх сурвалж: The Hill