Австралийн хоньчин Бен Жэксон Нью Соут Уэльс мужийн Гюра гэх газар мал аж ахуй эрхлэн амьдардаг. Харин түүний хайртай нагац нь 200 милийн зайд Квинсленд мужид амьдардаг байжээ.
Харамсалтай нь тэрээр 2 жилийн турш хорт хавдартай тэмцсээр амиа алдсан бөгөөд төрөл төрөгсөд нь түүнийг сүүлийн замд нь үдэх болсон ч коронавирусийн хоригоос болж Бен оршуулах ёслолд биеэр оролцож чадаагүй байна.
Гэвч тэр зүгээр нэг гашуудаад суухыг хүсээгүй тул хонио бэлчээдэг талбайд зүрхэн хэлбэр зурж, малынхаа тэжээлээр тойруулаад орхижээ. Тийнхүү түүний хонинууд тэжээлээ идэхээр цуглахдаа зүрхэн хэлбэрт орсныг дээрээс нь дроноор буулгасан юм.
Тэрээр хэвлэлийнхэнд өгсөн ярилцлагадаа “Хонинууд маань зүрхэн хэлбэрт ороход тэнгэрт одсон нагац маань үүлэн дундаас харсан байх гэж найдаж байна” хэмээжээ.
Бен тус бүтээлээ “хонин урлаг” гэж нэрийддэг бөгөөд энэ нь түүний анхны бүтээл биш гэнэ.
Эх сурвалж: NPR