Лондон хотын оршин суугч, 12 настай Беньямин Ахмед сургуулийнхаа амралтаар пиксель зураг зурж, түүнийгээ худалдан 290000 фунтийн ашиг олжээ.

Тэрээр Хачирхалтай Халимууд буюу Weird Whales гэх пиксель зургийн цуглуулга гаргаж, түүнийгээ хөрвүүлж үл болох токен (NFT) болгон худалдаалсан юм.

Хөрвүүлж үл болох токен гэдэг нь сүүлийн үед криптовалютын орон зайд хүч түрэн орж ирж байгаа бөгөөд худалдан авагч нь тухайн бүтээлийг өмчилдөг гэх дижитал сертификат л авдаг билээ. Цаашилбал тухайн бүтээлийг зарж байгаа хүн өөрийн бүтээл, зохиогчийн эрхийг худалдан авагчид өгөх шаардлагагүй юм.

Беньямин тийнхүү өөрийн бүтээлийг Эфериум (Ethereum) гэх криптовалютаар худалдаж байгаа ажээ. Түүнд одоогоор өөрийн бүтээлийг худалдаад олсон ашгаа хуримтлуулах ямар ч банкны уламжлалт данс үгүй гэнэ. Тиймээс түүний хөрөнгө Эфериумын ханшийг дагаж, нийт дүнгийн хувьд унах эсвэл өсөх нь шийдэгдэх юм.

Беньяминий аав Имран мэргэжлийн програм хөгжүүлэгч бөгөөд Беньямин болоод түүний ах Юсефийг багаас нь код бичихэд сургасан байна. Харин одоо тэд өдөрт 20-30 минутыг код бичих дасгал хийж өнгөрүүлдэг ажээ.

Хачирхалтай халимууд гэх дижитал зургийн цуглуулга нь түүний хоёр дахь NFT бүтээл юм. Тэрээр өмнө нь Minecraft тоглоомоор сэдэвлэсэн цуглуулгаа борлуулж байсан ч энэ удаагийн цуглуулга шиг сайн борлуулагдаагүй байна.

Энэхүү цуглуулгаа тэр алдарт пиксель халимын шог зургаас сэдэвлэн нийт 3350 төрлийн халим бүтээсэн юм.

Беньямин одоо өөрийн гурав дахь цуглуулга дээрээ ажиллаж байгаа гэнэ.

Эх сурвалж: BBC