Шанхай хотод байх сэтгэцийн эрүүл мэндийн төв 15 эмчлүүлэгчийнхээ нийт 60 бүтээлээр үзэсгэлэн гаргажээ. Үзэсгэлэнгийн гол зорилго нь сэтгэцийн эмгэг, сэтгэцийн өвчний эргэн тойронд тулгамддаг асуудлуудыг олон нийтэд таниулах байв.

“Зураас, Өнгө, Түүх” гэх сэдэвт тэрхүү үзэсгэлэн нь голдуу абстракт зураас, дүрс бүхий уран бүтээлүүдээс бүрдсэн юм. Энэ нь Шанхайн сэтгэцийн эрүүл мэндийн төв доторх №600 галерейд тавигдсан анхны үзэсгэлэн ажээ.

Тус эмнэлгийн эмч, үзэсгэлэнг дэглээч Чен Жиминий хэлж байгаагаар тэр өөрийн хамтран ажиллагсдын хамтаар энэ галерейг нээх тухай 2 жилийн өмнөөс бодож эхэлсэн гэнэ. Учир нь тэд бүгд сэтгэцийн эмгэг хүндэрсэн үед урлагийн терапи маш сайн эмчилгээ болдог гэдгийг хүлээн зөвшөөрдөг юм.

Тэрээр, “Хэдийгээр ямар ч мэргэжлийн сургалтад хамрагдаагүй ч гэлээ манай зарим өвчтөнүүд зураг зурахдаа маш их хүсэл тэмүүлэл, бүтээлч байдлыг мэдэрдэг. Тэднийхээ эхний үзэсгэлэнд зориулж би нийт мянга орчим бүтээлээс хүчтэй сэтгэгдэл төрүүлэхүйц, сонирхол татсан 60 бүтээлийг сонгосон. Бийрийн татлага бүрт би тэднийхээ түүх, сэтгэл мэдрэмжийг хардаг” хэмээжээ.

Чен эмч ирээдүйд сэтгэцийн эрүүл мэнд гэсэн сэдвийн дор уран бүтээлчидтэй хамтран ажиллахаар төлөвлөж байгаа бөгөөд урлагаар дамжуулан сэтгэцийн эмгэгтэй хүмүүсийг нийгэмд илүү өргөн хүрээлэлтэй болгоно гэж найдаж байгаа юм.

“Галерей гэдэг олон нийтэд эрүүл мэндийн боловсрол олгох сайхан талбар. Тэдний зургийг ойроос хараад хүмүүс сэтгэцийн эмгэгтэй хүмүүс, тэдгээр хүмүүсийн ертөнцийг илүү сайн ойлгож болно” гэдгийг ч Чен эмч хэлсэн байна.

Үзэсгэлэн энэ сарын 9-ний өдөр нээлтээ хийснээс хойш олон зуун үзэгчид ирээд байгаа бөгөөд ирэх сарын эхэн хүртэл үргэлжлэх ажээ.

Эх сурвалж: Xinhua