Нью-Йоркийн хөрөнгийн биржийн хамгийн том компани болох Apple-ийн зах зээлийн үнэлгээ 2.5 их наяд ам.долларыг давжээ.
Нью-Йоркийн хөрөнгийн бирж дээр 30-ны өдөр (орон нутгийн цагаар) Apple -ийн хувьцаа өмнөх өдрийнхөөс 3.04% (4.52 ам.доллар)-иар өсч 153.12 ам.доллар болж хаагдсан байна.
Ингэснээр зах зээлийн үнэлгээ 2.5 их наяд ам.долларыг даваад байгаа юм. Тус компани дөнгөж жилийн өмнө буюу өнгөрсөн оны наймдугаар сард анх удаа хоёр их наяд ам.долларын үнэлгээнд хүрч Америкийн хөрөнгийн зах зээлийн ертөнцөд түүх бүтээж байсан билээ.
Тухайн өдөр Apple компаний хувьцааны үнэ өсөхөд тус компаний дараагийн ухаалаг утас болох iPhone 13-ийг хиймэл дагуулын холбооны функцээр тоноглох тухай хэвлэл мэдээллийн хэрэгслээр гарсан мэдээллүүд ихээхэн нөлөөлсөн байна.
Сансарын тойрог зам дахь хиймэл дагуул (LEO) үйлдвэрлэгч Global Star компани Apple компанитай хамтран ажиллах талаар шуум дэгдсэнээр тус компаний хувьцаа 30-ны өдрийн үд дунд 44 хүртэл хувиар өссөн юм.
Хөрөнгийн зах зээл дээр зөвхөн Apple төдийгүй бусад технологийн компаниудын хувьцааны ханш ч өссөн байна.
Майкрософт, Netflix тус бүр 1.3%-иар өссөн бол Amazon 2%-иас дээш хувиар өссөн байна.
Үүний үр дүнд технологийн хувьцаан дээр төвлөрсөн Nasdaq индекс 136.39 нэгжээр (0.90%) өсч 15,265.89 болж дээд амжилтаа үргэлжлүүлэв. Nasdaq энэ сард 4%-иар өссөн байна.
Холбооны нөөцийн сангийн дарга Жером Пауэлл өнгөрсөн долоо хоногт мөнгөний бодлогыг зөөллөх талаар дахин дурдсан нь нь АНУ-ын хөрөнгийн зах зээл дэх хөрөнгө оруулагчдын сэтгэл санаанд эергээр нөлөө үзүүлсэн бололтой.Тэрээр мөн мөнгөний бодлогын хүүг нэмэх нөхцөл тийм ч хурдан бүрдэхгүй хэмээн тодотгожээ.
Эх сурвалж: Yonhap