АНУ-ын эмийн компани болох Pfizer нь 5-11 насны хүүхдүүдэд зориулсан Ковид-19 өвчний эсрэг вакцины зөвшөөрлийг энэ намрын сүүлчээр авахаар хүлээж байгаа аж.

АНУ-ын Хүнс, Эмийн Нийгэмлэгийн (FDA) захирал асан, Pfizer-ийн удирдах зөвлөлийн гишүүн Скотт Готтлиб хэлэхдээ "5-11 насны хүүхдүүдэд COVID-19 вакцины эмнэлзүйн туршилтын үр дүн ирэх сард гарна.” хэмээн мэдэгдсэнийг АНУ-ын CNBC cуваг 30-ны өдөр мэдээллээ.

Тэрбээр нэмж хэлэхдээ "Албан ёсоор зөвшөөрөл хүссэн өргөдлийг аравдугаар сард холбогдох байгууллагат хүлээлгэж өгөх төлөвлөгөөтэй байгаа юм. Өргөдөлд хавсаргасан судалгаа, бичиг баримтыг хянахад 4-6 долоо хоног шаардагддаг тул албан ёсоор зөвшөөрөл олгох хугацааг намрын сүүл эсвэл өвлийн эхээр болов уу гэж найдаж байна." гэжээ.

Өнгөрөгч 23-нд Хүнс, Эмийн Нийгэмлэг нь Ковид-19 өвчний эсрэг вакцинууд дундаас анх удаа Pfizer вакцинд албан ёсоор зөвшөөрөл олгож баталгаажуулсан юм. Гэвч энэхүү зөвшөөрөл нь 16 ба түүнээс дээш насныханд зориулсан ба 12-15 насныханд зөвхөн яаралтай үед ашиглахыг зөвшөөрсөн аж.

Харин Модерна компани Ковид-19 өвчний эсрэг вакциндаа бүх насны хүмүүс хийлгэж болох албан ёсны зөвшөөрөл авах хүсэлт гаргаад байгаа юм. Johnson & Johnson компаний (J&J) Janssen вакцин одоогоор албан ёсны зөвшөөрөл авах хүсэлт гаргаагүй байна.

АНУ-д хичээлийн шинэ жил эхэлсэнтэй холбогдуулан сургуулийн сурагчид болон өсвөр үеийнхнийг вакцинжуулах шаардлага нэмэгдэж байна. Хүүхдүүд хүндэрч буй тохиолдол нэмэгдэхийн хэрээр вакцинжуулалтыг хурдасгах шаардлага гараад байгаа юм.

АНУ-ын Өвчний хяналт, урьдчилан сэргийлэх төвөөс (CDC) мэдээлснээр, өнгөрөгч 22-ны өдөр эмнэлэгт хэвтэж эмчлүүлж буй хүүхдүүдийн тоо 303-т хүрсэн нь хамгийн өндөр үзүүлэлт болжээ.

Эх сурвалж: Financial news