Анхлан энэ оны нэгдүгээр сард Колумб улсад бүртгэгдээд байсан коронавирусийн “мү” гэх хувилбар одоогоор нийт 40 орчим улсад бүртгэгдээд байна. Улмаар АНУ-ын Небраск мужаас бусад 49 мужид бүгдэд нь бүртгэгдсэн тус хувилбарыг дельта хувилбартай харьцуулахад тархах чадвар илүү өндөр бөгөөд вакцинд тэсвэртэй байж магадгүй гэж үзэж байгаа юм.
Тэгвэл АНУ-ын 49 мужаас Калифорни мужид “мү” хувилбарын тохиолдол хамгийн их бүртгэгдэж байгаа ажээ. Хамгийн ойрын тоо баримтаас үзвэл Калифорни мужид “мү” хувилбарын 384 тохиолдол бүртгэгдсэнээс 167 нь Лос Анжелес хотод бүртгэгдсэн байна.
Лос Анжелес хотын Нийтийн эрүүл мэнд хариуцсан дарга Др. Барбара Феррэрийн хийсэн мэдэгдэлд, “”Мү” хувилбарын тархалтыг авч үзвэл манай мужийн иргэд өөрсдийгөө болон бусдыг хамгаалах үүднээс арга хэмжээ авч, халдвар хамгааллын дэглэмээ үргэлжлүүлэн мөрдөх хэрэгтэй байна. Вирус гэдэг зүйл өөрөө ийн хувьсдаг учраас вакцинд хамрагдаж, халдвар хамгааллын журмыг чандлан мөрдөх нь маш чухал. Энэ мэт арга хэмжээ авч байж л бид коронавирусийн тархалтыг хумьж, өөр, илүү аюултай, мутацид орсон шинэ хувилбар гарч ирэхээс сэргийлэх юм” хэмээжээ.
Тус хувилбарыг яагаад “мү” хувилбар гэж нэрлэсэн тухайд нэмэлт мэдээллийг хүргэхэд коронавирусийн хувилбаруудыг грек цагаан толгойн дарааллаар нэрлэж байгаа ба “мү” гэдэг нь грек цагаан толгойн 12 дахь үсэг ажээ.
Эх сурвалж: NY Daily News