Үргэлжилсэн халуун цаг агаар, долдугаар сараас хойш хур тунадасны хэмжээ бага байгаагаас үүдэн Хятадын баруун хойд хэсгийн Гансу мужид ган тохиогоод байгаа юм.
Тухайн бүсийн цаг уур судлалын төвөөс мэдээлж байгаагаар цаг агаарын нөхцөл байдал цаашид ч ийн үргэлжлэх төлөвтэй гэнэ. Хур тунадас орох магадлал маш бага тул ганг есдүгээр сарыг дуустал үргэлжилнэ гэж таамаглаж байгаа ажээ.
Одоогийн байдлаар ган Гансу мужийн нийт 27 аймаг сумыг хамарч, ган гачигт 1.51 сая хүн өртөж, 60 мянган гектар бүхий тариалан сүйдээд байна.
Энэ он гарсаар тус мужийн хувьд өмнөх онуудтай харьцуулахад 14 хувь бага хур тунадас орсон бол ид халууны үеэр Гансу мужийн төвийн болоод зүүн хэсгийн бүсэд хур тунадасны хэмжээ 50-80 хувиар буурсан ажээ.
Эх сурвалж: Xinhua