БНСУ-д дөрвөн настай, эрэлхэг Бэггү нохой хүний хамгийн сайн анд нөхөр болохыг ахин баталжээ.
Бэггүгийн эзэн, 90 настай, зөнөх өвчтэй Ким нь өнгөрсөн сарын 25-ны өдөр алга болоод байсан юм.
Цагдаагийнхан түүнийг эрэн сурвалжлах ажиллагааны үеэр хяналтын камерын бичлэг шалгахад эмэгтэй өөрийн нохойн хамтаар хотоос гарч явжээ. Тийнхүү эмэгтэйг хайхаар гал унтраах багийнхан болоод тухайн бүс нутгийн оршин суугчид хамтран ажиллаж, 40 цаг үргэлжилсэн хайгуулын дараа эмэгтэйг гэрээс нь 2 километрийн зайд байх будааны талбайгаас олжээ.
Тухайн өдрийн цаг агаарын байдал тааруу байсан бөгөөд бороо ширүүн орж байсан тул түүнийг олох бараг л боломжгүй байсан ч азаар нохойн хөдөлгөөнөөр эмэгтэйг амжилттай олсон байна. Тодруулбал, цагдаагийн албанаас удирдлагатай дрон нисгэж, тариан талбайг шалгах үеэр эмэгтэй аль хэдийн ухаангүй байсан ч нохойн хөдөлгөөнийг ажигласан цагдаа нар эмэгтэйн байгаа газрыг тогтоосон юм.
Цагдаагийнхны хэлж байгаагаар нохой байгаагүй бол эмэгтэй аль хэдийн амиа алдах байсан гэжээ.
Тийнхүү албаныхны зүгээс эрэлхэг зоригт үнэнч Бэггүд “хүндэт аврагч нохой” цол олгосон байна. Харин Бэггү БНСУ-д энэ алдрыг хүртсэн анхны нохой болжээ.
Эх сурвалж: CNN