АНУ-ын машины томоохон үйлдвэрлэгч Форд компани Энэтхэг улсад үйлдвэрлэл явуулахаа больж, тус улс дахь хоёр үйлдвэрээ хоёуланг нь хаажээ.
Фордын хэлж байгаагаар тэд Гужарат болон Тамил Наду мужуудад байрлалтай хоёр үйлдвэрээ 2022 оны хоёрдугаар хагас хүртэл хаах болсон бөгөөд экспортод гаргах зорилгоор машины сэлбэг хэрэгсэл л тэнд үйлдвэрлэнэ гэжээ.
Сүүлийн жилүүдэд энэ мэтээр машин үйлдвэрлэгч томоохон компаниуд Энэтхэг улсаас дайжих болсон юм. Улмаар 2017 онд Женерал Моторс компани Энэтхэгийн зах зээлд машин үйлдвэрлэхээ болиод байсан бол өнгөрсөн жил Харли Дэвидсон үйлдвэрлэлээ зогсоожээ.
Форд компани Энэтхэгт үйлдвэрлэл явуулаад 25 жилийн нүүрийг үзэж байгаа ч зах зээлийн хувьд өрсөлдөх чадваргүйд тооцогджээ.
Эх сурвалж: BBC