Гүүгл компанийн нэгэн салбар болох YouTube-ийн зүгээс Discord дээрх хөгжмийн ботуудын үйл ажиллагааг зогсоох арга хэмжээ аваад байна. Улмаар хэдхэн долоо хоногийн өмнө Groovy гэх хөгжмийн ботыг үйл ажиллагаагаа зогсооход хүргээд байсан YouTube тийнхүү дараагийн байгаараа Rythm гэх ботыг онилжээ.
Discord дээрх ботууд нь өөр өөрийн тусгай үүрэгтэй байдаг бөгөөд хөгжмийн ботуудыг ашигласнаар хэрэглэгчид хоорондын зайнаас үл хамааран хамтдаа нэг дуу сонсож, харилцаж болдог байснаараа давуу талтай байсан билээ.
Тэдний зүгээс Rythm гэх ботыг хөгжүүлэгч, эзэмшигч нарт ботынхоо үйл ажиллагааг зогсоох шаардлага хүргүүлсэн юм. Тус ботыг хэрэглэгчид гэхэд Discord серверүүд дээр 20 саяар тоологдох ба тухайн платформ дээр Rythm гэх ботыг хэрэглэгчдийн тоо нийтдээ 560 саяд хүрдэг байжээ.
Харин тухайн ботыг бүтээсэн Йоав Зиметийн хэлж байгаагаар, “Өнөөдөр эсвэл хэзээ нэг өдөр ийм зүйл болох нь тодорхой байсан. Тиймээс ч бид жилийн өмнөөс арай өөр зүйл дээр ажиллаж эхлээд байсан юм. Groovy ботын үйл ажиллагааг зогсооход л бидний ээлж удахгүй ирэхийг мэдсэн.
Миний бодлоор бидэнд шаардах хуудас ирнэ гэдэг бусад бүх хөгжмийн ботуудад ч шаардлага хүргүүлэх ажлын эхлэл байх, тиймээс ч бүгд л үйл ажиллагаагаа зогсоох байх. Discord платформыг анхнаас нь ашиглаж ирсэн хэнбугайд ч хөгжмийн ботгүйгээр платформоо ашиглах гэдэг хэцүү санагдах байх. Энэ үнэхээр харамсалтай хэрэг” гэсэн байна.
Эх сурвалж: The Verge