Исламын зэвсэгт Талибан бүлэглэлийнхэн Афганистанд эрх мэдлээ сэргээснээс хойшхи нэг сарын хугацаанд 150 гаруй хэвлэл мэдээллийн байгууллага үүдээ бариад байна.
Өнгөрсөн сарын 15-нд Талибууд Афганистаныг эзлэн авснаас хойш тус улсын 20 мужид үйл ажиллагаа явуулж асан хэвлэл мэдээллийн багадаа 153 орчим байгууллага өдгөө хаагдаад байгаа талаар Афганистаны Толоньюс агентлагийн мэдээнээс иш татан ОХУ-ын ТАСС суваг мэдээлэв.
Эдгээр байгууллагуудын үйл ажиллагаагаа зогсоох болсон гол шалтгаан нь эдийн засгийн хүнд байдал хийгээд Талибуудын зүгээс тавьсан элдэв дарамт, хоригууд байсан гэжээ.
Талибуудад эзлэгдсэнээс хойш тус улсад хэвлэл мэдээллийн салбарынхныг хэлмэгдүүлэх явдал газар сайгүй гарах болсон юм.
Саяхан нийслэл Кабул хотод болсон эмэгтэйчүүдийн эрхийг хамгаалах жагсаалыг сурвалжилж байсан сэтгүүлчдийг баривчилж, заримыг нь цагдаагийн газарт аваачин ташуураар зодсон гэх мэдээ дэлхийн сонорт хүрч хүмүүсийн эгдүүцлийг хүргэсэн билээ.
Үүгээр зогсохгүй Талибуудын зүгээс эмэгтэй сэтгүүлчдийг төрийн мэдлийн телевизэд ажиллахыг нь хориглоод байгаа юм. Орон нутгийн хэвлэл мэдээллийн хэрэгслүүд ч мөн эмэгтэй сэтгүүлчдийг ажиллуулахгүй гэсэн шийдвэрийг гаргаад байгаа гэнэ.
Эх сурвалж: SBS