АНУ-ын Ерөнхийлөгч Жо Байден, Их Британийн Ерөнхий сайд Борис Жонсон нар энэ сарын сүүлээр дээд хэмжээний уулзалт зохион байгуулахаар тохиролцсон тухай The Times сонинд 13-ны өдөр мэдээлэв.
Тус мэдээнд дурдснаар Ерөнхий сайд Жонсон энэ сарын 21-ний өдөр Нью-Йорк хотод болох НҮБ-ын Ерөнхий Ассамблейн чуулганд оролцохоор АНУ-д айлчилах үеэрээ Ерөнхийлөгч Жо Байдентай Цагаан ордонд уулзах санал тавьсан бөгөөд хоёр тал уг уулзалтын талаар зарчмын тохиролцоонд хүрсэн байна.
Энэхүү уулзалтаар Их Британийн талаас Афганистаны асуудлаас үүдээд тун эмзэг болсон хоёр орны харилцааг дахин сэргээж зөөлрүүлэх тал дээр хичээх байх гэсэн таамаг гараад байгаа юм.
Сар орчмын өмнө Афганистаны нийслэл Кабул хот эзлэгдэхэд Ерөнхий сайд Жонсон Ерөнхийлөгч Байдентай хамгийн түрүүнд холбогдохыг хүссэн ч хүсэлтийг хүлээж авах хүртэл 36 цаг хүлээх хэрэгтэй болсноор барахгүй, АНУ-ыг Афганистанаас цэргээ гаргах хугацааг хойшлуулахыг хүсэхэд уг саналыг хүлээж аваагүй юм.
Дээд хэмжээний уулзалтын үеэр Ерөнхийлөгч Байден Хятадад тавьсан хатуу хариу арга хэмжээг дэмжин ажиллахыг Ерөнхий сайд Жонсоноос хүсэх нь гарцаагүй хэмээн таамаглал дэвшүүлж байгаа аж.
Гэвч АНУ-ын мэдээллийн эх сурвалж хэлэхдээ "Ерөнхий сайд Жонсон Хятадад хэт хатуу хандахыг хүсэхгүй байгаа болов уу.” гэжээ.
Эх сурвалж: MBC