ОХУ-ын ерөнхийлөгч Владимир Путиний хэлж байгаагаар, түүний ойрын хүрээлэлд хэдэн арван хүнээс коронавирус илэрсэн тул тэрээр хувийн тусгаарлалтаа үргэлжлүүлэх болжээ.
Энэ долоо хоногийн эхэнд Кремлиэс ерөнхийлөгчийн ойрын хүрээлэлд коронавирусийн халдвар илэрсэн учраас Владимир Путин хэдий вакциндаа бүрэн хамрагдаж, тест өгөөд сөрөг гарсан ч тусгаарлалтаа үргэлжлүүлэх шаардлагатай болсныг мэдэгдсэн байна.
Владимир Путиний хэлж байгаагаар, “Миний ойрын хүрээлэлд нэг, хоёроор зогсохгүй хэдэн арван хүнээс коронавирусийн халдвар илэрсэн учраас бид бүгд хувийн тусгаарлалтын дэглэмээ үргэлжлүүлэх хэрэгтэй байгаа” гэжээ.
Харин коронавирус хэнээс илэрсэн болох тал дээр Кремлийн хэвлэлийн төлөөлөгч Дмитрий Песков "ерөнхийлөгчийн өдөр тутмын ажил хэрэг, түүний аюулгүй байдлыг хангахад оролцдог хүмүүс" хэмээн мэдээлжээ.
Хэдий ОХУ нь ард иргэдээ вакцинжуулалтад эрт хамруулж эхэлсэн ч, одоогоор нийт хүн амын 30 хувь нь л вакциндаа хамрагдсан байгаа юм.
Эх сурвалж: AP News