АНУ-ын Калифорни мужид түймэр гарч, дэлхийд алдартай Секвойя үндэсний цэцэрлэгт хүрээлэнд ойртсонтой холбогдуулан гал сөнөөгчид олон жилийн настай моддыг галд тэсвэртэй хөнжлөөр ороожээ.
Албаныхны мэдээлж байгаагаар түймэр хэдхэн цагийн дотор хүрээлэнд нэвтэрч болзошгүй тул тийнхүү хүрээлэнгийн зарим моддыг хамгаалж үлдэхэд чиглэсэн арга хэмжээ авсан байна.
Тус цэцэрлэгт хүрээлэн нь 2000 гаруй секвойя модтой бөгөөд дэлхийн хамгийн том мод болох Женерал Шерман тэнд байдгаараа онцлогтой. Женерал Шерман модны хувьд 83 метрийн өндөртэй, 2300-2700 жилийн настай юм. Секвойя модод нь хэдий галд тэсвэртэй гэгддэг ч албаныхан гал түймрээс болгоомжлохдоо дээрх арга хэмжээг авчээ.
Өдгөө Калифорни мужид үргэлжилж байгаа тус түймрийг унтраахад 350 гал сөнөөгч, нисдэг тэрэг, ус асгаж, гал унтраах зориулалттай онгоцнууд дайчлагдан ажиллаж байгаа юм.
Харамсалтай нь цаг агаарын өндөр температур, үргэлжилсэн ган гачгаас үүдэн энэ жилд л гэхэд Калифорни мужид 7400 түймэр бүртгэгдсэн бөгөөд нийт 9 мянган квадрат километр бүхий газар сүйдээд байгаа ажээ.
Эх сурвалж: BBC