Энэтхэг улсын баруун захад байх Гужарат мужийн Мундра боомтоор 3 орчим тонн героин нэвтрүүлэх байсныг илрүүлжээ. Тус улсын хууль бус наймаатай тэмцэх тагнуулын албанаас мэдээлж байгаагаар 2.7 тэрбум ам.долларын үнэ хүрэхүйц мансууруулах бодисыг хураан авсан байна.
Одоогоор яг хэчнээн хэмжээний героин байгааг тооцож байгаа бөгөөд хэрэгт холбогдуулан хоёр хүнийг баривчилж, хэд хэдэн хүнийг мөрдөн шалгах ажиллагаанд хамруулаад байгаа ажээ.
Ачааг анх Афганистан улсаас тальк чулуу хэмээн мэдүүлж гаргасан бөгөөд Иран улсаас Энэтхэгийн Гужарат муж хүрсэн байна.
Тагнуулын албанаас мэдээлж байгаагаар Иран улсын Бандар Аббас боомтоос мансууруулах бодис байж болзошгүй ачаа тээвэрлэж яваа хөлгийн тухай мэдээллийг хүргүүлсэн гэнэ.
Улмаар хөлгийг боомтод ирсэн даруй тагнуулын албаны алба хаагчид ачааг задалж үзэхэд героин болохыг мэджээ.
Хэрэг тийнхүү мөрдөн шалгах шатандаа явж байна.
Эх сурвалж: BBC