Өнгөрөгч хагас сайнд ХБНГУ-д амны хаалт зүүгээгүй эрд үйлчлэхээс татгалзсан шатахуун түгээх станцын ажилтны амь насыг хороосон ноцтой хэрэг гарчээ.
Албаныхны мэдээлж байгаагаар хохирогч 20 настай залуу байсан бөгөөд хэрэгтэн өөрийн уур уцаарыг барьж дийлэлгүй тийнхүү аминд нь хүрсэн байна.
Хэрэгтний хувьд 49 настай, Герман улсын иргэн юм. Тэрээр Идар-Оберштайнд байрлах шатахуун түгээх станцаар үйлчлүүлэх гэтэл ажилтан түүнийг амны хаалт зүүхийг шаардсанд уурсахдаа шатахуун түгээх станцыг орхиж, 30 минутын дараа амны хаалт зүүн ирээд ажилтныг толгойн тус газар нь буудан хөнөөсөн байна.
Тийнхүү хэргийг үйлдсэн даруй хэргийн газраас зугтсан боловч ням гарагт өөрийн биеэр цагдаагийн хэлтэст очжээ. Улмаар хэрэгтэн шатахуун түгээх станцаар үйлчлүүлэхдээ амны хаалт зүүхээс татгалзаж, цаашлаад мөрдөн шалгах ажиллагааны явцад ч коронавирусийн эсрэг журмыг хэрэгжүүлэхээс татгалзсан болохоо хүлээн зөвшөөрсөн байна.
Яллагчдын мэдээлснээр хэрэгтэн өмнө нь ямар нэг хэрэг үйлдэж байсан түүхгүй, галт зэвсэг эзэмших хууль ёсны эрхгүй этгээд байжээ.
ХБНГУ-аас коронавирусээс сэргийлэх олон журам танилцуулаад байгаа бөгөөд олон нийтийн үйлчилгээний байгууллагаар үйлчлүүлж байгаа хүн заавал амны хаалт зүүхээр журамласан юм.
Эх сурвалж: Fox News