Европын хүний эрхийн шүүхээс мягмар гарагт мэдээлснээр 2006 онд харамсалтайгаар амиа алдсан КГБ (Комитет государственной безопасности буюу Улсын аюулгүй байдлын хороо)-ийн алба хаагч асан Александер Литвиненкогийн үхэлд ОХУ буруутай болохыг илрүүлжээ.

Нэн ховор төрлийн цацраг идэвхт бодис болох полони 210 гэх бодист ногоон цай уусан хохирогч гүн хордсон байдалтай Лондонгийн их сургуулийн харьяа эмнэлэгт гурван долоон хоногийг өнгөрүүлж, хорыг гадагшлуулж чадалгүй амиа алдаж байсан юм.

Улмаар 43 насандаа амиа алдсан түүний эмнэлэгт үс нь халзарч, арьс нь шарлаж, хордсон байдалтай хэвтэн эмчлүүлж байгаа дүр зураг тухайн үеийн Британийн болон барууны хэвлэлээр түгж, хэрэг олны анхаарлыг татаад байсан бөгөөд хохирогч эмнэлэгт хэвтэж байх хугацаандаа мөрдөгч нарт өөрийг нь хордуулж, алахыг Владимир Путин тушаасан гэж мэдүүлж байжээ.

Тийнхүү Их Британи улс хэрэг гарсан мөчөөс хойш түүний үхэлд Оросыг буруутгаж, 2016 онд Оросын тагнуулын байгууллага түүний амийг хороох тушаал өгсөн гэж баталж байсан бол мягмар гарагт Европын шүүхээс “Ноён Литвиненкогийн үхэл ОХУ-д хамаатай” гэдгийг хүлээн зөвшөөрсөн байна.

Гэвч Москвагийн талаас бүгдийг гүтгэлэг хэмээсээр байгаа юм. Улмаар Кремлиэс тухайн мэдэгдлийг “туйлын муйхар, Европын хүний эрхийн шүүхийн нэр хүндийг гутаасан мэдэгдэл” гэж тодорхойлоод байгаа ажээ.

Эх сурвалж: The Hill