“Side-eying Chloe” буруу “Буландаж харах Клои” зургийг NFT хэлбэрээр зарна
9 сарын 23. 18:520 сэтгэгдэл1,786

“Side-eying Chloe” буруу “Буландаж харах Клои” зургийг дуудлага худалдаанд оруулж, хэдэн мянган ам.доллароор зарах болжээ.

Өдгөө 10 настай Клои Клем охины нүднийхээ булангаар харж, хачирхалтай хийгээд инээдтэй царай гаргаж буй зураг 2013 онд интернетийг шуугиулж, түүнээс хойш охины зургаар хүмүүс “meme” буюу тайлбарт зураг зохиох болсон юм.

Улмаар түүний зураг ихээхэн алдрыг дагуулсан тул гэр бүлийнх нь зүгээс зургийг NFT хэлбэрээр зарахаар болж, 5 ширхэг Эфериум буюу 15 мянган ам.долларын нэрлэх үнэтэй дуудлага худалдаа эхэлсэн байна.

Зургийн түүхийг өгүүлбэл, охиныг 2 настай байхад ээж нь түүнийг эгчийнх хамтаар Диснейланд руу дагуулж явах болсноо хэлж байгаагаар бичлэг эхэлдэг юм. Тийнхүү гайхалтай мэдээг охиддоо дуулгахад эгч нь баярласандаа уйлдаг бол түүний яагаад уйлж байгааг үл ойлгох Клои ээж рүүгээ хачирхалтай харж байх мөчийг дүрсжүүлэн үлдээжээ.

Охидын ээж бичлэгийг тийм их алдарт хүрнэ гэж ер төсөөлөлгүй цахим хуудаснаа нийтлэхэд 20 сая хандалт авч, тэр л гурван секунд үзэгдээд өнгөрөх Клои охины зураг интернетийг байлдан дагуулах болсноор өнөөгийн энэ их алдарт хүрчээ.

Сонирхуулахад NFT хэлбэрээр зураг худалдан авах нь уламжлалт худалдан авалт хийхдээ адилгүй бөгөөд эзэмшигч нь зөвхөн дижитал хувилбарыг өмчилж, тухайн зургийг өмчилдөг гэсэн батламж л хүлээж авдаг юм.


Эх сурвалж: BBC

Энэ мэдээнд өгөх таны сэтгэгдэл?
0
0
0
0
0
0
0
Сэтгэгдэл үлдээх
Нийт 0 сэтгэгдэл
Онцлох мэдээ