Сүүлийн 10 жилийн хугацаанд Тайландад очсон 100 сая орчим гадаадын жуулчдын хувийн мэдээлэл цахим орчинд цацагдсан болохыг баталлаа.
Bangkok Post болон Nation зэрэг орон нутгийн хэвлэл мэдээллийн хэрэгслүүдийн 23-ны өдөр мэдээлснээр, 2011 оноос хойш Тайландад ирсэн 106 сая орчим гадаадын жуулчдын хувийн мэдээлэл өнгөрсөн сард цахим орчинд цацагдсан гэжээ.
Энэ тухай нэгэн кибер аюулгүй байдлын судалгааны компанийн ажилтан олж мэдээд Тайландын кибер аюулгүй байдлын салбарын удирдлагуудад тэр даруй мэдэгдсэн байна. Тайландын эрх баригчдын зүгээс тус мэдээлэлд хандах эрхийг маргааш нь хаасан ба уг мэдээлэлд аялагчийн овог нэр, хүйс, паспортын дугаар, Тайландад ирсэн огноо, визний төрөл зэрэг хувийн чанартай зүйлс багтсан байсан талаар хэвлэлүүд мэдээлэв.
Хувийн мэдээлэл алдагдсаныг олж илрүүлсэн кибер аюулгүй байдлын судалгааны компанийн ажилтан 2011 оноос өнөөг хүртэл Тайландад аялсан хүмүүсийн хувийн мэдээлэл ил болсон байж магадгүй гээд мөн энэ дунд өөрийнх хувийн мэдээлэл байсан тухай онцолжээ.
Bangkok Post сонинд Тайландын Үндэсний Кибер Аюулгүй Байдлын Агентлагийн зүгээс мөн өнгөрсөн сард энэ хэрэг гарсан болохыг баталсан гэж мэдээлэв. Тайландын Аялал жуулчлалын зөвлөлийн тэргүүн Ютсак Супассон хэлэхдээ: "Ийм явдал дахин давтагдахгүй гэдэгт жуулчид итгэлтэй байж болно.” хэмээн мэдэгджээ.
Эх сурвалж:JoongAng