Японы Осака хотод найз бүсгүйнхээ 3 настай хүү рүү халуун ус цацаж амь насыг нь бүрэлгэсэн хэргийн сэжигтнийг прокурорын байгууллагад шилжүүлжээ.
NHK телевизийн 24-ний өдөр дамжуулснаар, Осака хотын Хабикино дүүргийн харьяат 23 настай Мацухара Такуми нь өнгөрсөн сарын 31-нд Сэцү хотод амьдардаг найз бүсгүйнхээ 3 настай хүү Нимүра Арито рүү халуун ус цацаж, улмаар хүүг амь насаа алдахад хүргэсэн хэрэгт буруутган баривчилсан ба мөн өдөр прокурорын байгууллагад шилжүүлсэн байна.
Хүү өнгөрсөн сарын 31-нд түргэн тусламжаар эмнэлэгт хүргэгдсэнийхээ дараа нас баржээ. Мөрдөн байцаах албанаас мэдээлснээр хүү 75 градусын усанд багадаа 5 минут орчим байснаас хүнд хэлбэрээр түлэгдэн шархаа даалгүй амиа алдсан тухай Асахи Шимбун сонинд мөн мэдээлжээ.
Сэжигтэн өнгөрсөн тавдугаар сараас хойш хүүгийн ээжтэй хамтран амьдрах болсон бөгөөд хэрэг гарах үед хүүгийн ээж гэртээ байхгүй байжээ.
Хүүг нас барснаас долоо хоногийн дараа NHK телевиз тухайн үеийн нөхцөл байдлыг эрэн сурвалжлан дамжуулж байхад сэжигтэн "Хүүтэй хамт усанд орж байхдаа усны температурыг нэмэгдүүлэн тоглосон.” гээд "Шүршүүрийн усыг 38 градусаас 60 градус хүртэл л нэмэгдүүлсэн.” гэж мэдэгдэж байжээ. Сэжигтэн мөрдөн байцаалтын эхний явцад мөн ийнхүү мэдүүлэг өгч байсан аж.
Талийгаач хүүгийн ээж өнгөрсөн тавдугаар сард "Найз залуу нь хүүд нь гар хүрч хөхрүүлсэн.” талаар тус хотын холбогдох байгууллагат хандаж зөвлөгөө хүсч байсан хэмээн орон нутгийн зарим хэвлэл мэдээлэв.
Эх сурвалж: JoongAng