Хуавэй компанийн дэд захирал Мэнг Ванжоу суллагдаж, эх орондоо ирсэн талаар Хятадын засгийн газрын зүгээс тайлбар өгөхдөө "БНХАУ-ын иргэнийг улс төрийн хавчлагад оруулсан хэрэг гэж үзэж байна. Үүний зорилго нь Хятадын технологийн томоохон компаниудыг нухчин дарах гэсэн оролдлого юм.” гэжээ.

Хятадын ГХЯ-ны хэвлэлийн төлөөлөгч Хуа Чуньин 25-ны өдөр Хятадын Залуучуудын Сүлжээ сайтад өгсөн ярилцлагадаа, "Мэнг Ванжоугийн хэргийн талаарх Хятадын байр суурь тууштай бөгөөд тодорхой байгаа." гэжээ. Тэрбээр мөн "Хатагтай Мэнгийн санхүүгийн залилан хийсэн хэмээн буруутгаж буй уг хэрэг нь бүхэлдээ зохиомол зүйл юм. АНУ болон Канад улсын засгийн газрын зүгээс дур мэдэн баривчилгаа явуулсан.” гэж буруутгажээ.

Харилцаа холбоо, сүлжээний тоног төхөөрөмж үйлдвэрлэгч Хятадын Huawei компанийг үүсгэн байгуулагч эрхмийн охин Мэнгийг АНУ-ын Хууль зүйн яамтай мөрдөн байцаалтын ажиллагааг хойшлуулахаар тохиролцсоны дараа орон нутгийн цагаар 24-ний өдөр Канадад гэрийн хорионоос сулласан байна. Түүнийг Ираны эсрэг тавьсан АНУ-ын хоригийг зөрчсөн хэргээр 2018 оны арванхоёрдугаар сард Канадад баривчилсан бөгөөд батлан ​​даалтад гаргасныхаа дараа АНУ-ын прокуророос ял сонсгосон юм.

Эх сурвалж: Asian Economy