Нидерланд улсын засгийн газраас өнгөрсөн долоо хоногт вакцины гэрчилгээтэй хүмүүсийг үдшийн цэнгээний газрууд болоод зоогийн газруудад нэвтрүүлэх журмыг баталсан. Тэгвэл өнгөрөгч бямба гарагт хэдэн зуун хүн цугларан, тус журмыг эсэргүүцэж буйгаа илэрхийлжээ.

Жагсагчид “Вакцины гэрчилгээг болиул” гэх утгатай лоозон, зурагт хуудас өргөж, хөгжим чангаар тавин алхсан байна.

Харин тус улсын эмнэлгийн байгууллагын холбооноос явуулсан судалгаагаар зоогийн газруудын 40 хувь нь үйлчлүүлэгчдээ заавал вакцины гэрчилгээтэй байхыг шаардахгүй, вакцины гэрчилгээ гэдэг улс төрийн суртал ухуулгын хэрэгсэл хэмээсэн байр суурьтай байгаагаа илэрхийлжээ.

Зоогийн газрууд ийм байр суурьтай байхад ч тус улсын засгийн газраас вакцины гэрчилгээ шаардах тухай журмыг тийнхүү хэрэгжүүлж эхлээд байгаа юм. Улмаар тус журмыг эсэргүүцсэн кабинетын гишүүнийг ерөнхий сайд Марк Рутте ажлаас нь чөлөөлсөн ч хэрэг гараад байгаа ажээ.

Энэ төрлийн эсэргүүцлийн жагсаал дан ганц Нидерланд улс гэлтгүй Франц улсад ч мөн гараад байна.

Эх сурвалж: The Hill