Грек улсын Крит арлын ойролцоо 5.8 баллын хүчтэй газар хөдлөлт болсны улмаас 1 хүн амиа алдаж, 9 хүн шархадсан байна.

Aссошиэйтед Пресс болон Франс-Пресс зэрэг гадаадын томоохон хэвлэл мэдээллийн агентлагуудын мэдээлснээр, орон нутгийн цагаар 27-ны өдрийн 9:17 цагт Крит арлын Ираклион тосгоноос зүүн урд зүгт 25 км зайд газар хөдлөлт болжээ. Улмаар голомтын ойролцоо орших нутгийн иргэд газар хөдлөлт мэдрэгдсэн даруй гудамж руу гарч, ангидаа хичээл хийж байсан сурагчид биеийн тамирын талбай руу гүйх зэргээр бага хэмжээний үймээн болсон байна.

Газар хөдлөлтийн хүчийг Грекийн Геодинамикийн хүрээлэн 5.8 балл гэж мэдээлсэн бол Европын Газар дундын тэнгисийн газар хөдлөлтийн төв болон АНУ -ын Геологийн алба 6.0 балл байсан гэжээ. Газар хөдлөлтийн голомтын гүн нь ойролцоогоор 10 км орчим байжээ.

Тус улсын засгийн газрын зүгээс газар хөдлөлтийн улмаас нэг хүн амиа алдаж, есөн хүн шархадсан талаар мэдээлэв. Талийгаач нь газар хөдлөлтийн төвтэй зэргэлдээ орших Аркалохори тосгонд сүмийн барилгад засвар хийж байсан ажилчин байжээ. Барилгын дээвэр нурсны улмаас амиа алдсан гэж үзэж байгаа аж.

Эхний газар хөдлөлтөөс хойш одоог хүртэл том, жижиг 20 орчим чичирхийлэл мэдрэгдсэн нь хохирлын хэмжээ улам ихсэх таамаглалыг үүсгээд байна. Хамгийн хүчтэй чичирхийлэл 4.6 балл байжээ.

Эх сурвалж: Аsian economy