Саяхан Хятадын зүүн хойд бүс нутаг эрчим хүчний хомсдолд орсны улмаас цахилгаан эрчим хүчийг урьдчилан мэдэгдэлгүйгээр тасалжээ.

Хятадын Шингён сонинд Ляонин мужийн хамгийн том хот болох Шэньяны зарим хэсэгт гэнэт цахилгаан тасарч, гэрлэн дохио хүртэл ажиллахаа больсны улмаас иргэдэд хүндрэл учирсан талаар өнгөрөгч 23-ны өдөр мэдээлжээ.

Ляонин мужийн эрх баригчид цахилгаан тасалдсан нь эрчим хүчний хомсдлоос үүдэлтэй гэдгийг хүлээн зөвшөөрч, сүүлийн жилүүдэд цахилгаан эрчим хүчний хэрэглээ хурдацтай нэмэгдэж байгаа боловч үйлдвэрлэл буурсаар байгаа тухай онцолжээ.

Ляонин мужийн зэргэлдээ орших Жилин мужийн Жилин хотод цахилгааны хомсдлоос болж ирэх оны гуравдугаар сар хүртэл цахилгаан болон усны хязгаарлалт хийх нь өдөр тутмын энгийн явдал болж магадгүй хэмээн таамаглаж байна.

Тус сонины мэдээлснээр зүүн хойд мужуудын захиргаанаас сүүлийн үед өрхийн цахилгааны хэрэглээг хүртэл хязгаарлаж буйгаас харахад цахилгаан эрчим хүчний салбар хүндхэн байдалтай байгаа нь тодорхой байна гэв.

Хятадын хэвлэл мэдээллийн хэрэгслүүдийн онцолж буйгаар зөвхөн зүүн хойд бүс нутгийн 3 мужаар тогтохгүй Гуандун, Жэжян зэрэг аж үйлдвэрийн бүс нутгуудаар эрчим хүчний хомсдол нүүрлэн үйлдвэрүүдэд ч хязгаарлагдмал байдлаар эрчим хүч түгээж байгаа аж.

Цахилгаан эрчим хүчний хомсдолын шууд шалтгаан нь нүүрсний нийлүүлэлт багассан болоод үнэ өссөнтэй холбон тайлбарлаж байгаагийн дээр засгийн газраас авч хэрэгжүүлж буй нүүрстөрөгчийг багасгах хөтөлбөр, мөн Австрали улсын нүүрсний импортод хязгаарлалт хийсэн зэрэг төрийн бодлого нөлөөлж байгаа гэв.

Эх сурвалж: YTN