Шатаж буй байшингаас хөршүүдээ аварч, өөрөө амь үрэгдсэн 15 настай Иран хүүгийн түүх хүмүүсийн зүрх сэтгэлийг хөдөлгөж байна.
Өнгөрөгч 9-ний өдөр Ираны өмнөд хэсэгт амьдардаг Али Рэнди хөршийнхөө хашгирахыг сонсоод гэрээсээ гүйн гарчээ. Улаан гал дүрэлзэн утаа хөшилдөж буй хөршийнх нь гэрт хоёр хүн байгааг мэдээд тэрбээр ямар ч эргэлзэх зүйлгүйгээр тэр даруй байшин руу гүйн орж дунд эргэм насны эмэгтэй болон 80 орчим насны эмээг байшингаас гарахад нь туслажээ.
Рэндигийн аварсан хөршүүд нь хөнгөн гэмтэл авсан боловч хүү өөрөө гуравдугаар зэргийн буюу биеийн 90% нь түлэгдэн амиа алджээ. Тэрээр эмнэлэгт хоёр долоо хоногийн турш хэвтэн эмчлүүлж байгаад өнгөрөгч 24-ний өдөр шархаа даалгүй нас баржээ.
Ираны ард иргэд дөнгөж 15 нас хүрсэн бяцхан хүүгийн төлөө эмгэнэн гашуудаж байна. Олон нийтийн сүлжээгээр Рэндигийн түүхийг харуулсан зургийг хуваалцаж "Жинхэнэ баатар хэзээ ч үхдэггүй. Тэр бидний зүрх сэтгэлд үүрд мөнх.” хэмээн талийгаачийг дурсан гашуудлаа илэрхийлсээр байгаа юм. Интернет хэрэглэгчид мөн "Тэрээр насанд хүрсэн хүний ч зориглон хийж чадахгүй зүйлийг хийлээ.”, “Эрэлхэг хүү”, “Зүрх зүсэгдэж байна.” гэх мэтчилэн сэтгэгдлээ үлдээжээ.
Эх сурвалж: SBS