Хоёр жилийн өмнө Хойд Солонгост криптовалютын технологийг нийлүүлсэн хэрэгт сэжиглэгдэж буй Америкийн мэргэжилтэн буруугаа хүлээжээ.
Блүүмберг сувгийн мэдээлснээр Ethereum санд ажиллаж байсан криптовалютын мэргэжилтэн Виржил Гриффит нь Нью-Йорк хотын өмнөд дүүргийн шүүх дээр Хойд Солонгосын эсрэг авсан хориг арга хэмжээний тухай хууль болох Олон улсын эдийн засгийн онцгой эрхийн тухай хуулийг зөрчсөн гэдгээ хүлээн зөвшөөрсөн талаар онцолжээ.
Уг хуулинд Хойд Солонгос зэрэг терроризмыг ивээн тэтгэгч улсуудад бараа, үйлчилгээ, технологи экспортлохыг хориглосон байдаг бол хууль зөрчсөн этгээдэд 20 хүртэл жилийн хорих ял оноох заалттай байдаг аж. Шүүх ирэх оны нэгдүгээр сард түүнд ял оноох төлөвтэй байна.
Гриффит нь Калифорнийн Технологийн Институтэд компьютерийн шинжлэх ухааны докторын зэрэг хамгаалсан бөгөөд Ethereum санд ажиллаж байсан юм. Тэрээр 2007 онд цахим нэвтэрхий толь бичиг Википедиагийн мэдээллийг засварласан нэрээ нууцалсан интернэт хэрэглэгчдийг тодорхойлох боломжтой програмыг боловсруулж, олонд танигдаж байжээ.
Гриффит 2019 онд Пхеньянд болсон 'Пхеньяны блокчейн ба криптовалютын бага хурал'-д багшаар оролцсоныхоо дараа АНУ-д баривчлагдсан юм.
Эх сурвалж: SBS