Фэйсбүүк компани орон нутгийн цагаар 27-ны өдөр маргаан дагуулаад байсан хүүхдүүдэд зориулсан Инстаграм аппликейшний хөгжүүлэлтийг зогсоож байгаагаа зарлалаа.

Ройтерс болон бусад гадаадын хэвлэл мэдээллийн хэрэгслүүдийн мэдээлж буйгаар Инстаграмын толгой компани болох Фэйсбүүкээс өнөө өглөө "’Instagram Kids’ аппликейшнийг хөгжүүлж байгаагаа зөв алхам гэж үзэж байсан ч бид уг төслийг зогсоох шийдэлд хүрлээ." хэмээн мэдэгджээ. "Хүүхдүүд Инстаграмыг аль хэдийн ашиглаад эхэлсэн учраас тэдэнд тохирсон хөгжүүлэлтийг цаашид хийх нь бидний үүрэг юм.” гээд “Үүнээс гадна Инстаграм нь өсвөр үеийнхний аюулгүй байдлыг хангах болон эцэг эхчүүдийн хяналт тавих системийг сайжруулах тал дээр үргэлжлүүлэн анхаарна.” гэдгээ компанийн зүгээс онцолсон байна.

АНУ-д одоогоор мөрдөгдөж буй хуулиар 13-аас дээш насныхныг Инстаграм ашиглахыг зөвшөөрсөн байдаг ба тус компанийн зүгээс үүнээс доош насны хүүхдүүдэд зориулсан “Instagram Kids” аппликейшнийг хөгжүүлж байсан юм. Гэсэн хэдий ч саяхан Уолл Стрит Журнал сониноос 'Instagram' аппликейшн нь өсвөр үеийнхний сэтгэцийн эрүүл мэндэд сөргөөр нөлөөлж буйг мэдсээр байж Фэйсбүүк компани ямар нэгэн арга хэмжээ аваагүй тухай мэдээлснээр маргаан дагуулаад байжээ.

Тус сонины дэлгэсэн Фэйсбүүк компанийн дотоод баримт бичигт Инстаграм нь залуучуудад тэр дундаа өсвөр үеийнхэнд сөрөг нөлөө үзүүлж байгаа талаар дурдсан байжээ. Уг мэдээлэл цацагдсаны дараа 'Instagram Kids' аппликейшн хөгжүүлэлтийг буруушаасан улс төрчид үгээ хэлцгээж, Сенатын Байнгын хорооны дэргэдэх Хэрэглэгчийн эрхийг хамгаалах дэд хорооны зүгээс тус компанийн удирдлагуудыг дуудаж, сонсгол хийсэн юм.

Эх сурвалж: YTN