Мягмар гарагт Итали улсын Милан хотноо уур амьсгалын хүрээнд залуу үеийнхний дээд хэмжээний уулзалт зохион байгуулагдсан билээ. Тэгвэл тус уулзалтын үеэр Швед улсаас гаралтай, залуу тэмцэгч Грета Тунберг үг хэлсэн юм.

Харин тэрээр индэр дээр зогсон үг хэлэхдээ олон улсын удирдаг нарыг шүүмжлээд авчээ. Улмаар түүний хэлснээр өнгөрөгч 30 жилийн хугацаанд уур амьсгалын өөрчлөлтийн эсрэг авсан арга хэмжээ үнэн хэрэгтээ хий үгнээс цаашгүй хэмээсэн байна.

Тийнхүү тэрээр үг хэлэхдээ зарим улсын тэргүүнүүдийн уур амьсгалын өөрчлөлтийн хүрээнд хэлсэн үгсийг ёжилж, биелүүлээгүй амлалтуудыг нь сануулсан ажээ.

Түүний хэлсэн үгсээс онцолбол, ерөнхийлөгч Жо Байдены илтгэлийн хэсгээс “...Намайг “уур амьсгалын өөрчлөлт” гэж хэлэхэд танд юу бодогдож байна вэ? Надад л лав ажил бодогддог. Ногоон ажлууд. Ногоон ажлууд…” гэх үгсийг нь давтаж, Францын ерөнхийлөгч Эммануэль Макроны “Бидэнд хоёр дахь дэлхий гэж үгүй” гэж хэлснийг егөөдсөн байна.

Улмаар ярианыхаа төгсгөл Грета, “...Уур амьсгалын саармагжилт, бла, бла, бла. Ийм л үгсийг бид “удирдагч” нараасаа сонсож байна. Хэлж байгаа үгс нь хэдий сайхан ч ямар ч бодит үр дүнд хүргээгүй, ямар ч итгэл найдвар, мөрөөдлийг өдөөгөөгүй. Хоосон үгс, биелээгүй амлалтууд л байна” хэмээжээ.

Эх сурвалж: CNN