20-р зууны хамгийн аюултай халдварт өвчинд тооцогддог Испанийн томуу болон дэлхийн 2-р дайныг үзэж туулсан 105 настай эмээ Ковид-19 өвчний улмаас амиа алджээ.
АНУ-ын Коннектикут мужид амьдарч байсан 105 настай Примета Жиакопини нь Ковид-19 өвчнөөр эмнэлэгт хэвтэн эмчлүүлж байх үедээ 16-ны өдөр нас барсан тухай Ассошиэйтед Пресс агентлаг мэдээлэв.
Хатагтай Жиакопини нь цар тахлын эсрэг вакцин хийлгэсэн байсан хэдий ч охин нь 9-ний өдөр гэрт нь эргэхээр очиход тэрээр аль хэдийн халдвар аван хүндэрсэн байдалтай байсан бөгөөд яаралтай тусламжийн төвд хүргэж хүчилтөрөгчийн аппаратанд оруулсан боловч эцэст нь уг халдварын улмаас насан эцэслэжээ.
Тэрээр 1918 онд 675,000 америкчуудын амийг авч одсон Испанийн томуугаар ээжийгээ алдах үедээ ердөө хоёрхон настай байжээ. Ассошиэйтед Пресс агентлаг "Цар тахлаар эхэлсэн түүний амьдрал мөн л цар тахлаар төгслөө” гэжээ.
Эх сурвалж: YTN