ОХУ-д өндөр настай өвчтөнүүдэд Спутник вакцин хийх гуравдугаар шатны туршилт явагдаж дуусжээ. Тэгвэл пүрэв гарагт ОХУ-ын Эрүүл мэндийн сайд Михаил Мурашко туршилтын үр дүнг мэдээлсэн байна.

Тэрээр, “Бид Спутник вакцины клиник туршилтын гуравдугаар шатыг амжилттай зохион байгууллаа. Туршилтын хүрээнд 60-аас дээш настай өвчтөнүүд хамрагдсан. Туршилтын үр дүнд вакцин маш сайн үзүүлэлттэй гарлаа” хэмээжээ.

Улмаар Гамалея төвөөс Спутник вакцинд дагалдах зааврыг шинэчлэн боловсруулахаар болсон бөгөөд туршилтын үр дүнг эцсийн байдлаар нэгтгэж байгаа гэнэ.

ОХУ-ын хувьд өнгөрөгч нэгдүгээр сарын 18-ны өдрөөс эхлэн насанд хүрсэн ард иргэдээ вакцинд хамруулсан юм. Тус улс зөвхөн өөрсдийн үйлдвэрлэсэн вакциныг иргэддээ хийж байгаа ба нийт 4 вакциныг ард иргэдэд санал болгож байгаа ажээ. Тэдгээр нь Спутник, Спутник лайт, ЭпиВакКорона, КовиВак гэх вакцинууд юм.

Эх сурвалж: ТАСС