Испани улсын харьяа Ла Пальма арал дээр дэлбэрсэн галт уулын хайлмаг Атлантын далайд орж, бэхжин, арлын газар нутгийн хэмжээнд нөлөөлж байгаа тухай Европын холбооноос мэдээлжээ.
Коперникийн мэдэгдсэнээр пүрэв гарагийн байдлаар арлын баруун эрэгт хайлмал чулуу D үсэг шиг хэлбэр үүсгэн царцаж, ойролцоогоор 338 гектар газрыг хамарч байна гэсэн юм.
Галт уулын хайлмагаас үүдэн агаарт гидрохлоридын хүчил, галт уулын бичил шил ялгаруулж байгаа бөгөөд хэрэв түүнийг хүн амьсгалах аваас нүд, арьс загатнаж, уушгины өвчлөл үүсэх боломжтой ажээ. Аз болоход салхины чиглэл одоогоор хүн оршин суудаггүй бүсийг чиглэж байгаа гэнэ.
Галт уулын хайлмагаас үүдэн нийт 855 барилга, 30 километрийн урттай засмал зам, дэд бүтцийн чухал бүтээн байгуулалтууд сүйдсэн бөгөөд хохирол цаашид ч нэмэгдэж болзошгүй юм.
Эх сурвалж: ABC News