Хятадын хүн ам 45 жилийн дотор хоёр дахин буурч магадгүй гэсэн судалгаа гарчээ.
Орон нутгийн хэвлэл мэдээллийн хэрэгслүүдийн мэдээлснээр, Хятадын Сиань Жяотун их сургуулийн судлаачид саяхан сургуулийнхаа эрдэм шинжилгээний сэтгүүлд нийтэлсэн тайландаа, хэрэв төрөлтийн түвшин нэмэгдэхгүй бол Хятадын одоогийн 1.4 тэрбум хүн ам 45 жилийн дотор хоёр дахин буурч магадгүй гэж таамаглаж байгаагаа дурджээ.
Өмнө нь НҮБ-аас 2019 онд гаргасан тайланд Хятад улс 2065 он гэхэд 1.3 тэрбум орчим хүн амтай болно гэсэн таамаг мөн гарч байсан юм. Үүний зэрэгцээ АНУ-ын Вашингтоны их сургуулийн судлаачид өнгөрсөн онд The Lancet эрдэм шинжилгээний сэтгүүлд нийтэлсэн тайландаа Хятадын хүн ам 2100 он гэхэд хоёр дахин буурна гэж таамаглаж байжээ.
Дээрх НҮБ-ын урьдчилсан тооцоо нь Хятадын төрөлтийн түвшин 1.7 ба түүнээс дээш байх тохиолдол дээр үндэслэсэн гаргасан бол өнгөрсөн онд төрөлтийн түвшин 1.3 байсан талаар Сиань Жяотун их сургуулийн судлаач онцолжээ. Хүн амынхаа тоог хэвээр байлгахын тулд төрөлтийн түвшинг 2 дээр барих ёстой бөгөөд өнгөрсөн онд Хятадад 12 сая хүүхэд мэндэлсэн нь НҮБ -ын тооцоолсноос 25% бага байна.
Орон нутгийн хэвлэл мэдээллийн хэрэгслээр "Хэдийгээр Хятадын засгийн газар гурван хүүхэд төрүүлэх гэх мэт төрөлтийн урамшуулал хэрэгжүүлж байгаа боловч үл хөдлөх хөрөнгийн үнэ нэмэгдэх зэрэг эдийн засгийн хүчин зүйл нь төрөлтийн түвшин буурах гол шалтгаан болж байгааг олон тооны судалгаа харуулж байна." гэжээ.
Эх сурвалж: MBC