АНУ-д цар тахлаас үүдэлтэйгээр иргэдийн сэтгэл гутралд өртөмтгий байдал гурав дахин нэмэгдэж, шинж тэмдгүүд улам дордсон болохыг тогтоожээ.

Анагаах ухааны "The Lancet" сэтгүүлд 5-ны өдөр нийтлэгдсэн АНУ-д насанд хүрэгчдийн дунд цар тахлаас өмнөх болон ид дэгдэж байх үеийн сэтгэл гутралын түвшинг тусгай үнэлгээний хэрэгслийн тусламжтайгаар тогтоосон судалгааны үр дүнг Бостоны Их Сургуулийн Нийгмийн Эрүүл Мэндийн Дээд Сургуулийн профессор Сандро Галеа доорх байдлаар тайлагнасан байна. АНУ-ын насанд хүрэгчдийн дунд сэтгэл гутралын түвшин цар тахлаас өмнө 8.5% байсан бол өнгөрсөн оны 3, 4-р сард 27.8%, энэ оны судалгаагаар 32.8% болж нэмэгдсэн дүнгээс харахад цар тахал ид дэгдэж байх үед иргэдийн сэтгэл гутралын түвшин зогсолтгүй нэмэгдэж буйг харж болохоор байна гэж судалгааны багийнхан онцолсон байна.

Профессор Галеа хэлэхдээ "Ямар нэгэн гэнэтийн цочирдом үйл явдлын дараа хүмүүсийн сэтгэл гутрал дээд цэгтээ хүрээд аажмаар буурдаг байхад Ковид-19 өвчнөөс үүдсэн сэтгэл гутралын түвшин улам нэмэгдэж байна” гээд энэ нь хар салхи болон эбола зэрэг халдварт өвчин тархсаны дараа ажиглагдсан үр дүнгээс эсрэг байдалтай байгаа тухай мөн дурджээ.

Ялангуяа орлогын түвшин нь сэтгэл гутралд ихээхэн нөлөөлдөг болохыг тогтоосон бөгөөд өнгөрсөн жилийн хавар хийсэн судалгаагаар жилийн 20,000 доллар ба түүнээс доош орлоготой хүмүүс 75,000 доллар ба түүнээс дээш орлоготой хүмүүстэй харьцуулахад 2,3 дахин их хямралд өртдөг болохыг тогтоож байсан юм. Гэтэл энэ хавар дахин судлаад үзэхэд энэ зөрүү 7 дахин болж өссөн байна.

Эх сурвалж: SBS