Энэтхэг улсын нийслэл Дели хотод Эйр Индиа компанийн онгоц гүүрэн доогуур орж, гацжээ. Саяхан худалдсан гэж мэдэгдээд байгаа тус онгоц гацах үедээ зорчигчгүй явсан бөгөөд худалдан авагч нарт нь хүлээлгэн өгөхөөр явж байсан байна.
Гүүрэн доор орж гацсан онгоцны зураг, бичлэг цахим орчныг хөгжөөгөөд авсан бөгөөд тухайн зураг, бичлэгийг нийтэлсэн сэтгүүлч Эйр Индиа компаниас тайлбар хэлэхийг хүсэхэд тухайн онгоц аль хэдийн өөрсдөд нь хамаарахаа больсон хэмээжээ.
Түүний хэлснээр, “Манай бүртгэлээс хасагдсан энэ агаарын хөлөг зарагдсан юм л даа. Тийнхүү өчигдөр орой шинэ эзэмшигчид нь хөлгөө авахаар ирсэн юм. Улмаар Эйр Индиа компани тухайн агаарын хөлөг, хөлгийн багтай ямар ч холбоогүй” гэсэн байна.
Харамсалтай нь Эйр Индиан лого тэмдгийг арилгаагүй байснаас үүдэн тус хэрэг тухайн байгууллагын нэр хүндэд сөргөөр нөлөөлж байгаа ажээ.
Эх сурвалж: BBC