Индонез улсад оршин суудаг байгаль, цаг уурын төлөө тэмцэгчид дэлхий дахинаа хаягдал хуванцар ямар их байгааг харуулах зорилгоор бүхэлдээ хаягдал хуванцраас бүтсэн музейг нээжээ.
Музейн гол зорилго нь хүмүүст хуванцрын хэрэглээгээ анхаарч үзэх, нэг удаагийн хуванцар хэрэглэлээс татгалзахыг уриалахад оршиж байгаа юм.
Музей Гресик хотод толилуулагдаж байгаа бөгөөд музейг босгоход гурван сарыг зарцуулсан байна. Харин музейн гол эд болох хуванцрыг гол, далайн эрэг зэргээс түүж, цуглуулжээ. Улмаар музейг босгоход 10 мянга гаруй хуванцар хаягдлыг ашигласан гэнэ.
Индонез улсын хувьд хуванцрын хаягдал маш их бөгөөд далайд хаягддаг нийт хуванцар хаягдлын хэмжээгээр дэлхийд хоёрдугаарт бичигддэг ажээ.
Музейг нээснээс хойш 400 гаруй хүн зочлоод байгаа юм.
Эх сурвалж: CNN