Даваа гарагт Францын хүрээлэн буй орчны яамнаас хуванцрын хэрэглээг багасгахын тулд ирэх оны нэгдүгээр сараас эхлэн жимс жимсгэнийг хуванцар, гялгар сав баглаа боодолд баглаж худалдаалахыг хориглох болжээ.
Дээрх хуулийг энэ оны хоёрдугаар сард баталсан бөгөөд тус хууль нь ирэх оны эхний өдрөөс хэрэгжих юм. Улмаар хуулийн хүрээнд 30 орчим төрлийн жимс жимсгэнийн жагсаалтыг нийтэд танилцуулсан байна. Тэдгээр жимсийг ямар ч гялгар, хуванцар сав баглаа боодолгүй зарах ёстой гэнэ. Мөн жагсаалтад хэд хэдэн төрлийн хүнсний ногоо багтсан юм.
Энэ оноос Франц улс хуванцар соруул, аяга, гал тогооны хэрэглэлүүдийг хориглоод байгаа ажээ.
Гэсэн ч одоогоор хэд хэдэн төрлийн жимс, хүнсний ногоог хуванцар савлагаатай зарах шаардлагатай байгаа бөгөөд 2026 оны зургадугаар сар гэхэд бүх л төрлийн хуванцрын хэрэглээг танах гэнэ.
Эх сурвалж: CNN