АНУ-д өнгөрсөн наймдугаар сард сайн дураараа ажлаасаа гарах хүмүүсийн тоо дээд хэмжээнд хүрчээ. Улмаар 4.3 сая хүн наймдугаар сард ажлаа хүлээлгэн өгсөн байна.

Энэ нь долдугаар сарын тоон үзүүлэлттэй харьцуулахад даруй 2.7 хувиар өссөн үзүүлэлт болохыг “Нээлттэй ажлын байр болоод хөдөлмөрийн зах зээлийн эргэлтийн судалгаа”-ны тайланд дурджээ. Тус судалгааг 2000 оноос хойш гаргаж байгаа бөгөөд урьд ийм олон хүн ажлаасаа гарч байсан тохиолдол үгүй юм.

Харин хүмүүсийн ажлаасаа гарах болсон шалтгааныг цалин хөлсний хэмжээ, ажлын нөхцөлтэй нь холбон тайлбарласан байна. Түүнчлэн байр, хоолны үйлчилгээ, бөөний худалдаа, төрийн болон орон нутгийн захиргааны боловсролын салбарын хүрээнд хүмүүс хамгийн ихээр ажлаа хүлээлгэн өгсөн болохыг ч тайланд дурджээ.

Улмаар байгууллагууд ажилтны хомстолд орж байгаа бөгөөд нээлттэй ажлын байрны тоо ч мөн 10.4 сая буюу маш өндөр байгаа юм. Энэ маягаараа ажил хийх хүн олдохгүй бол үнийн өсөлтөд нөлөөлж, бүтээгдэхүүн үйлчилгээний хэвийн байдал алдагдаж, хүргэлт, шуудангууд саатах болно хэмээжээ.

Эх сурвалж: CNN