Их Британийн хунтайж Уильям чинээлэг хүмүүсийн ээлж дараалан сансарт аялаж буйг шүүмжлэн, эх дэлхийгээ аварч хамгаалах тал дээр анхаарлаа хандуулахыг уриалав.
Тэрээр орон нутгийн цагаар 14-ний өдөр BBC сувагт өгсөн ярилцлагадаа сансарын хайгуулийн хувийн компаниудын дунд өрнөөд буй өрсөлдөөний талаар онцлоод "Бид дэлхийг орхиж, дараагийн амьдрах гараг хайхынхаа оронд эх дэлхийгээ хамгаалахад анхаарлаа хандуулах ёстой” гэжээ. Мөн тэрээр сансарт нисэх талаар огтхон ч боддоггүйн дээр сансарт нисэхэд ялгардаг их хэмжээний нүүрстөрөгчийн хийн талаар харин санаа зовдог хэмээн сэтгэгдэлээ хэлжээ.
Сансрын аялал жуулчлалын зах зээл дээр Амазоны үүсгэн байгуулагч Жефф Безосын “Blue Origin”, Элон Маскийн “SpaceX”, Ричард Брэнсоны “Virgin Galactic” гэсэн компаниудын дунд ширүүхэн өрсөлдөөн өрнөөд байгаа билээ.
Уильям үргэлжлүүлэн "Ханхүү Жорж 30 жилийн дараа энд суугаад эх дэлхийгээ аврах талаар надтай ижил зүйл ярьж байвал маш эмгэнэлтэй явдал болно" гэжээ. Тэрээр эцэг ханхүү Чарльз болон өвөө ханхүү Филипийн нөлөөгөөр маш багаасаа цаг уурын өөрчлөлтийн талаар сонирхож ярилцдаг байсан аж.
Ханхүү Уильям нь уур амьсгалын өөрчлөлт болон эх дэлхийгээ аврах талаар хамгийн шилдэг санааны эзэнд энэ жилээс эхлэн “Earthshot” шагналыг гардуулахаар болсон байна. Тус шагналыг таван төрлөөр шалгаруулах бөгөөд тус бүр 1 сая фунт стерлингээр шагнуулах аж. Ялагчид энэ сарын сүүлээр тодроно.
Эх сурвалж: Asian Economy