Сансрын хайгуулын SpaceX компанийн тэргүүн Элон Маск агаарын тээврээр зорчигчдод зориулсан өндөр хурдны интернэт үйлчилгээг хиймэл дагуулын "Starlink" интернетийн тусламжтайгаар нэвтрүүлэхээр агаарын тээврийн компаниудтай хэлэлцээ хийж байгаа ажээ.

Орон нутгийн цагаар 14-ний өдөр гадаадын томоохон хэвлэл мэдээллийн хэрэгслүүдийн мэдээлснээр, Маск мөн өдөр өөрийн Твиттер хуудсаараа дамжуулан энэ тухай зарласан талаар онцолжээ. Гэхдээ холбогдох агаарын тээврийн компаниудын талаар болон яг хэзээнээс эхлэн тус үйлчилгээг нэвтрүүлэх гэх мэт тодорхой нарийн мэдээллийг тусгаагүй байна.

Энэхүү мэдээ олон нийтэд түгсэн даруй зорчигч тээврийн онгоцнуудад интернэт үйлчилгээ үзүүлдэг “GoGo” компанийн хувьцаа 5.7%-иар унасан байна.

Энэ оны эхээр SpaceX компанийн дэд ерөнхийлөгч Жонатан Хопеллер мөн “Starlink” сансрын интернэтийг ашиглан нислэгийн Wi-Fi үйлчилгээ үзүүлэх талаар хэд хэдэн агаарын тээврийн компаниудтай хэлэлцээ хийж байгаагаа мэдэгдэж байсан билээ.

Тус компани нь энэхүү “Starlink” төслийнхөө хүрээнд дэлхийн өнцөг булан бүрт ашиглах боломжтой өндөр хурдны интернетийн үйлчилгээг бий болгох зорилгоор бага тойрог замд 12000 жижиг хиймэл дагуулыг хөөргөхөөр төлөвлөөд буй юм. Одоогийн байдлаар 1740 хиймэл дагуул хөөргөөд байгаа аж.

Space X компани нь уг төслийн хүрээнд бүх төрлийн нисэх онгоц болон усан онгоц, ачааны машин зэрэг тээврийн хэрэгслүүдэд үйлчилгээгээ өргөжүүлэхээр шийдээд байгаа ба үүний тулд хөрөнгө оруулалтаа 10 тэрбум доллароор нэмэгдүүлэхээр төлөвлөжээ.

Маск өнгөрөгч 8-р сард өөрийн Твиттер хуудсандаа “Starlink” нь дэлхийн 14 орны 100,000 хэрэглэгчийн урьдчилсан захиалгыг баталгаажуулаад байгаагаа мөн зарлаж байв.

Эх сурвалж: Asian Economy