Японы тэрбумтан, загварын салбарын магнат Юсаку Маезава арван-хоёрдугаар сарын наймны өдөр ОХУ-ын Союз сансрын багийнхантай сансарт аялахаар болсон билээ.
Тэгвэл тов нь дөхөж буй аяллынхаа хүрээнд ноён Маезава олон нийтэд сансрын нислэг яг ямар байдгийг илүү ойроос тольдоход туслах гэнэ. Улмаар тэрээр продюсер Ёзо Хирано, ОХУ-ын сансрын нисгэгч Александер Мисуркин нартай цуг явах ажээ. Тийнхүү продюсер Хирано түүний аяллыг дүрс бичлэгт буулгах юм.
Өвөрмөц аяллынхаа хүрээнд Маезава сансрын уудамд хийж үзэх 100 зүйлийн жагсаалт ч гаргасан гэнэ. Түүний аялал сансарт 12 хоногийн турш үргэлжлэх ажээ.
Улмаар Маезава, Хирано нар 2009 оноос хойш сансарт нисэх гэж мөнгө төлсөн анхны зорчигчид ч болох юм. Гэвч одоогоор аяллын зардал ямар үнэтэй болохыг эцэслэн тогтоогоогүй байгаа гэнэ.
Эх сурвалж: AP News